भीषण हुरी बतासग्रस्त रसुवाको जनजीवन सहज हुँदै

रसुवा, १० चैत । आज बिहानदेखि चलेको भीषण हुरी बतास थामिएपछि उत्तरी रसुवाको जनजीवन सहज हुँदै गएको छ । 

जिल्ला प्रहरी प्रमुख अवदेश विष्टका अनुसार अपराह्नदेखि हुरी बतास रोकिएकाले जनजीवनमा सहजता आएको हो । सो हुरी बतासले धुन्चे, राम्चे, हाकु, कत्लाङ, कोल्चुङ, गतलाङ, थुमन, स्याफ्रु, ब्रिदिम, टिमुरे र लाङ्टाङ गाविससमेतका बासिन्दा प्रभावित भएका थिए । 

हुरी बतासका कारण सयौँ स्थानीयवासीको घर र कृषि, अस्पताल, मत्य केन्द्र, खानेपानी, नेपाल प्रहरी, सशस्त्र प्रहरीसमेतका सरकारी निकाय र केही गुम्बामा क्षति पुगेको थियो । 

क्षतिको विवरण सङ्कलन भइरहेको छ । अहिलेसम्म यहाँ विद्युत् आपूर्ति हुन सकेको छैन । रासस