जलेरै प्राण गयो मायादेवीको ...

 ४ चैत । पश्चिम चितवनको चित्रवन–१४ स्थित भगडीकी ९१ वर्षीया वृद्धाको जलेरै प्राण गएको छ । 

सानो झुप्रोमा एक्लै बस्दै आएकी ९१ वर्षीया मायाँदेवी पौडेलको त्यही झुप्रोसँगै एक साता अघि जलेर ज्यान गएको हो । उनको मृत्यु त्यहीँका गाउँले र प्रहरीले पछि मात्रै थाहा पाए । 

२०३७ सालमा श्रीमान् हरिलाल बितेपछि उनी एक्लै थिइन् । उनीहरुका कुनै पनि सन्तान जन्मिएनन् । आफैँ पकाएर खाँदै आएकी उनी पछिल्लो समय अशक्त भएपछि गाउँमा माग्ने र जसले जे दिन्छ त्यही खाने गरेकी स्थानीयवासी राधा अर्यालले जानकारी दिनुभयो । फागुन २६ गते अकस्मात घटना भयो । उनी घरसँगै जलेर सकिइन् । 

‘मट्टितेल मागेकी थिइन्, एक लिटर बजारबाट ल्याइदिउँला भनेको, त्यो पनि दिन भ्याइनँ”, स्थानीयवासी इन्द्रबहादुर कुमालले भन्नुभयो । टुकीको सहारामा एक्लै बस्ने गरेकी थिइन् । पछिल्लो समयमा मट्टितेल सकिएकाले मैनबत्ती बाल्थिन् । २६ गतेको राति करिव ९ बजेको समयमा घरमा आगो लाग्यो । कारण कसैलाई थाहा नभए पनि मैनबत्ती पल्टिएर आगो लागेको अनुमान गाउँलेको छ । आगो दन्किएर चिच्याएको आवाज आए पछि गाउँले आए । 

नजिक धेरै घरहरु भए पनि स्थानीयवासीले बचाउन सकेनन् । मृतक मायाँदेवीका भतिजा पर्ने नारायणप्रसाद पौडेल कैयाँै प्रयास गरे पनि बचाउन नसकेको बताउनुहुन्छ । “ढोका फोरेरै निकाल्ने प्रयास भएको थियो, आगो दन्किएकाले सकिएन”, पौडेलले भन्नुभयो । घरका केही मुड्काबाहेक सबै जलेर खरानी भएको छ । शवपरीक्षणपछि अन्तिम संस्कार गरिएपनि गाउँलेले उनको दूःखद मृत्युलाई अझै भुल्न सकेका छैनन् । मर्ने बेलामा पनि जलेर प्राण गयो भनेर गाउँले अझै चुकचुकाउँछन् । रासस